ELKARRIZKETA

Aitor Alcaideri

Entrevista a Aitor Alcaide, concejal de Urbanismo y Medio Ambiente
En esta entrevista, Aitor nos cuenta su experiencia en este primer año de legislatura, así como los temas que están abordando en su grupo de trabajo: Inspección Técnica de Edificios que debe realizarse en los edificios de más de 50 años y las ayudas para hacer frente a los gastos que genere esa inspección; el proceso para decidir como queremos gestionar el agua del pueblo, con todos los datos en la mano; los proyectos de eficacia energética para ahorrar en el consumo energético; las obras de la estación de tren para mejorar la accesibilidad; las reuniones con la Diputación para instalar semáforos en la carretera (una posibilidad cada vez más factible); las mejoras en la recogida de basuras y el servicio de recogida de residuos de gran tamaño; Oxinburu (de momento se van a abordar las obras para garantizar la seguridad)…
Y anima a las vecinas y a los vecinos a participar, ya sea en el grupo de trabajo, o en las reuniones vecinales, acercándose al ayuntamiento, etc. Cualquier forma es válida si es por el interés de todo el pueblo.


Ia urte bat daramazu udaletxean zinegotzi gisa. Zein da esperientzia horren inguruan egiten duzun balorazioa?
Positiboa, esango nuke. Ezberdina, lantaldean aurreko urtean izandako esperientziarekin alderatuz; osagarria beste aldetik, gestioa osotasunean jarraitzeko aukera ematen baitu. Lehen urtea, udal mekanikak legegintzaldi osoan izan dezakeen erritmoari neurria hartzeko balioko zuela espero dut. Zaila izan da batez ere uda ondorengo lan zurrunbilora ohitzea, eta gauzak planifikatzeko saiakera etengabe egiten badugu ere, beti daude bat-batean sortzen diren gauzak, eta hauetara egokitu edo ahal bezala moldatzea baino ez dago.  

Hirigintza arloan badaude nobedade batzuk. Horietako bat da Eraikinen Ikuskapen Teknikoa. Zer da ikuskapen hori? Nork egin behar du?
Bat-batean agertu zaigun gauza horietako bat da. Eusko Jaurlaritzaren arau bat da, eraikinen (etxebizitzen) egoera ezagutzeko: egoera orokorra, energia mailan eraginkorrak diren eta irisgarritasun aldetik araudi berrira egokitzen ote diren.
50 urtetik gora duten etxebizitzen jabeek egin behar dute. Horretarako, teknikari bat kontratatu behar dute aipatutako ikuskapena egiteko. Ikuskapenaren emaitza udaletxean aurkeztu behar da, honek Eusko Jaurlaritzara bidal dezan.

Udalak laguntzeko moduak aztertu ditu
Bai, apirileko osoko bilkuran, Eraikuntzen, Instalazioen eta Obren gaineko Zergaren ordenantzan aldaketa bat onartu zen. Aldaketa honetan, EITn ondorioz egin beharreko obrei zerga honen % 100eko hobaria aplikatuko zaie. Bestalde, ikuspenaren ondorioz etxea utzi behar duten herritarrei, hasiera batean ostatua hartu ahal izateko, eman ahal zaizkien diru-laguntzak aztertzen ari gara.
 

Hainbat urte eta gero, ADIF lanean hasi da geltokia egokitzeko. Nolakoak izan dira hartu-emanak? Ematen du txukun geratuko dela geltokia, baina edozeinek izango du erabiltzeko aukera?
2011n, arkupeko espaloia egin genuen, espaloi horrekin, trenbidea gurutzatu gabe, geltokiko bi nasen arteko lotura ahalbidetzen genuen eta, bide batez, altuera irabazten zen gaur egun egiten ari diren arrapalentzako.  Obra egin eta gero, ADIFekin hainbat hartu-eman izan ditugu, bai idatziz bai zuzenean, dagokien obra egin zezaten eskatzen. Pasa den abenduan, bilera bat izan genuen, eta urtarrilean obrak hasiko zituztela agindu ziguten. Obra hasi aurretik, aspektu tekniko batzuk ere landu behar izan genituen elkarrekin.
Badirudi obra erritmo onean doala, eta txukun geratuko dela ematen du. Kontua da obra honek nasetara ailegatzeko irisgarritasuna bermatuko duela, baina arazoa trenera igotzeko orduan izango dela. Horretarako, Urduñatik Bilbora doan linea osoko geltokietako nasak egokitu behar dituzte, gero trenak egokitzeko. Beraz, nasetara edozein ailegatu ahal izango da, baina trenera ez. Hau da, umeen karroak eta, errazago izango dute, baina gurpildun aulkidunak ezin izango dute trenera igo.

Bestalde, zer proiektu zaudete lantzen?
Lehenik aurreko legegintzalditik hasiak zeuden gaiei jarraipena ematea izan da helburua. Eta moduren batean, estrategikoak diren lan zein ekiteko moduei heltzea izan da lehen lana.
Uraren azterketa egiten ari gara. Horretarako enpresa batekin ari gara elkarlanean. Herritarrei uraren kudeaketarako bi eredu eskaini nahi dizkiegu: alde batetik, kudeaketa propioa eta, bestetik, kontsortzioren kudeaketa. Urte amaierarako bukatuta egotea aurreikusten dugu.
Zaramaren inguruan ere ari gara. Eskualdeko beste herriekin batera, zerbitzu hobeagoa eman ahal izateko, hondakinak biltzeko zerbitzuaren lehiaketa abiatu berri dugu. Irailerako zerbitzu berria martxan egotea espero dugu. Traste zaharren bilketa ere eskainiko dugu. Hau ekainean hasiko da.
Eraginkortasun energetikoarekin jarraitzen dugu, diru-laguntzak horretara bideratzen jarraitzen baitira. Iberdrolarekin ditugun kontratuen eta fakturen azterketa egin ondoren, lehentasunak markatu genituen. Alde batetik, kontratu batzuen potentziak egokitu genituen eta, ondorioz, aurrezpen esanguratsuak lortu ditugu. Bestetik, energia gehien kontsumitzen duten elementuetan ekin dugu. Aurreko urteetan, argiteria publikoko lanparak aldatu ditugu eta hemen ere asko aurreztu da. Aurten, futbol-zelaiko argiak aldatu nahi ditugu.
Oxinburu eraikina ere eskuartean daukagun egitasmoa da. Aurten, atera den diru-laguntza batera egokitu dugu, eta proiektua egiten dugun bitartean, eraikina desmuntatu, hau da, teilatua kendu eta hormetako emokadura erauziko ditugu, segurtasuna bermatzeko, eta aldi berean, 25.000 euroko diru laguntza jasotzea espero dugu.
Semaforoak jarri ahal izateko lanetan ere jarraitzen dugu. Asko izan dira Aldundiarekin izan ditugun harremanak, semaforoak jartzeko baimena lortzeko. Idatziz eta Bilbon egindako bileretan, errepideari buruzko azterlana ere aurkeztu diegu. Gai hau garrantzitsua da eta lortzeko modukoa dela uste dugu.
Beste obrekin ere ari gara. Zollon, Zolloko juntak eskatuta, bolatokia egokitzen ari gara eta frontoi atzean aterpe txiki bat egiteko asmoa daukagu. Uribarriko aterpean ere, bigarren fasea egiteko asmoa daukagu.
Lehentasunen artean dugu ere urtero diputazio eta autonomi erkidego mailako erakundeek ateratzen dituzten laguntza ezberdinetara aurkeztea, hauen bidez, azken 5 urteetan, proiektu ezberdinetan bataz beste 69.000 € jaso baititu udalak. 

Hirigintza oso urrun geratzen zaie herritarrei, zuzenean eragiten ez badie. Zer esango zenieke lantaldean parte hartzera animatzeko?
Beno, askotan zaila izango da askorentzat, agenda edo ordutegi aldetik lantaldearen bileretan zuzenean parte hartzea, edo hauen jarraipena egitea, baina interesa duenarentzat, lantaldeak lirateke parte hartzeko eta herrian bultzatzen diren proiektu ezberdinen jarraipena egiteko biderik egokiena. Beste alde batetik, auzo-batzarrak ere badaude, baina hauek auzo bakoitzak dituen behar espezifikoen berri jakiteko egiten dira, eta urteak bitarteko antolatzen dira.
Edonola ere, arazo larriren bat izanez gero, udalera zuzenean jo dezakete, gu jakinaren gainean egon eta arazoari nola aurre egin ikus dezagun.